女人餐桌失儀十宗罪

女人餐桌失儀十宗罪，食野食到"吱吱"聲，又狼吞虎嚥，在男人心目中固然扣晒分，但其實女人用餐時唔覺意講個電話，藐藐嘴彈D野唔好食，都可能被男人一筆out消。今次走訪約156位年齡介乎20－35歲的香港男士，每人選出三種女人最失儀的行為，結果得出以下十種惡行最乞人憎最失儀，睇自己衰邊樣？

第1宗
彈三彈四，猛話D野唔好食。
115票-有九成男人都話呢樣是食飯大忌，呢個錯實在好嚴重咁話！皆因佢覺得同你食飯已經係佢畀錢，D野唔好食，大家同樣「難過」，仲想點？

第2宗
懶有儀態食雞全翼都要用刀叉切，問你死未?！
89票-扮淑女今時今日極乞男人憎，三分二男仔都覺得如果同個姿整女人食飯會好唔自然、唔開胃！

第3宗
用餐時同朋友傾電話勁吹水
85票-過半數男仔覺得咁樣好唔尊重對方，好應該講幾句就收線。

第4宗
食魚又話腥，食肉又話肥，食番薯又話怕放屁......真係咁多人死，唔見你死！
68票-相信唔少女仔都中招，皆因我成日減肥減肥再減肥，但係男人覺得好無癮，難同你share食，唯有食自己！

第5宗
點菜食飯，左諗右諗唔知食乜。
24票-調查中唔算好多男人介意你諗好耐，不過當然亦需要睇場合，如果有個waitress企嚮度，就無禮貌喇！

第6宗
食完飯擺晒架生「填顏色」，十足化妝示範。
22票-呢個環節相信唔女仔都會犯，但有一成半男人都覺得在佢面前補妝唔係太好，應該留番嚮廁所做！

第7宗
一路食一路講，你唔煩我都煩！
21票-所謂「食不言寢不語」，約8％的男人覺得雞啄唔斷好難頂；不過大部分覺得如果食飯唔講就好悶，唔怕繼續講！

第8宗
食完飯剩得個口唇膏框
20票-唔少男仔都話未見過如此「奇景」，好想知究竟會係點樣，覺得好好笑。

第9宗
唇膏印到杯杯碟碟一地都係。
18票-雖然唔係好多男人介意，不過唇印甩在杯邊始終好失儀！

第10宗
埋單無意思畀錢。
5票-絕大部分男人覺得同女人出街食飯畀錢天經地義，但亦有強烈反對支持男女平等，咁我梗支持大圍啦！